بقلم المحامية والحقوقية المعروفة أ.ماجدة رشوان، نقلًا عن صفحتها على الفيسبوك
بص بقي يا سيدي ،لو نويت تصيف في الساحل لازم تعرف حدودك كويس و تحدد ميزانيتك حسب مكانك قبل او بعد خط مارينا ٥ لأن ده بيفرق كتير جدا في كل حاجة..
بداية من الأسماء هتلاحظ انك لو في الضفة الشرقية اللي بتبدأ من العجمي او كرير فإنت كدة مش في الساحل أصلا ولا من حقك تنطق الكلمة دي لانك مرتبط بإسم القرية اللي قاعد فيها واللي غالبا مرتبطة بنقابة معينة او هيئة تدريس جامعة اقليمية و طبعا ا.دسوقي مدير شؤون العاملين اختار لها اسم كئيب زي قرية السراب كنوع من الواقعية او قرية المروة او الهيثم علي اسم ولاده واول فرحته، القري دي غالبا فيها دفء عائلي وقصص حب بريئة وبيطبخوا كل يوم عادي وبيعملوا ساندوتشات لولادهم في البحر ،خروجاتهم اغلبها بغرض الأكل و البوركيني فيها مكتسح مع القليل من الجلاليب والمايوهات ،والترفيه مرتبط غالبا بلقمة القاضي و نص محلات فطير الكرة الأرضية تقريبا ،ركوب العجل فيها منتشر ومطاعمها بتهتم بنوع الأكل بغض النظر عن طريقة تقديمه يعني مش هتلاقي سوشي و حركات عشان اهلها مفتحين و بيفضلوا الكباب والكفتة والعيش البلدي، مفيش سهرات ماجنة ولا حفلات مولعة و صلاة الجمعة فيها هي الحدث الأهم طول الأسبوع و بعدها كله بيهجم عالبحر و أقصي انحراف فيها قعدة الكافيهات ولو عايز تختار عروسة بنت حلال وتعمر معاك خليك في الجزء ده من الساحل ، العربيات بتبدأ من الجيل الاسطوري لل١٢٨ و الهيونداي والرينو والبيجو لغاية البي ام والمرسيدس بالمقارنة بالضفة الغربية اللي أولها المرسيدس للبسطاء قبل ما تدخل علي المازيراتي والأستون مارتن و رانج روفر والبنتلي و الجاجوار، و عشان كدة هتحس من اول حدود مارينا ٥ انك في بلد تانية خالص و هتعرف ان لها قوانين و قواعد مختلفة تماما ، مبدئيا من حقك تقول انك طالع ساحل من غير أ و ل و حاجات كتير اوي اسمها بيتغير، يعني الشبشب الزيكو اسمه سليبر والكوتشي اسمه سنيكر والبونيه اسمه تيربون والمكنة اسمها بيتش باجي والقهوة الفرنساوي اسمها كورتادو والملاك اسمهم أونرز و المستأجر فيزيتور والكحك دونتس و زيت الشمس فيه منه ٣٥٠ نوع تاني وبلوك و كاروت و هاويان و تروبيكال وأسعاره بتبدأ من ٧٠٠جنيه بالمقارنة بنوع واحد اسمه نيفيا في الساحل الطيب..
الساحل الشمالي - الجرجير اللي كان قدامك في مراقيا بجنيه الحزمة و بتحرق منه فدان في السلطة البلدي ، هايبقي اسمه روكا و بيحطوه عالبيتزا أم ٢٥٠ جنيه في البيتزاريا اللي هو فطاطري الأغنياء ولا مؤاخذة، حتي صوابع زينب بقي اسمها ريتشولز وتقريبا جابوا صوابع يارا او لارا عشان زينب مش قد المقام، أماكن الخروج اسمها لازم يبدأ ب The كذا ذا مول ،ذا ووك، ذا أي حاجة والسلام، او بكلمة LA لا فيستا لا سوستة لا تقع من طولك برضو اي لا وخلاص، لازم ترفع مصروف ابنك ل١٥٠٠ جنيه يوميا كحد ادني عشان يقدر يجاري أصحابه اللي فيه منهم معاه فيزا كارت مفتوحة ، المطاعم هنا بتقدملك اي حاجة في رغيف ب١٠٠٠جنيه وبتاكلها و انت ساكت بس المهم المطعم يكون اسمه غريب سوشي موشي او برجر لاتو او زمبروطة، والأكلة نفسها لازم برضو اسمها يكون غريب يعني البوفتيك اسمه ميلانيز والرز اسمه ايجيبشن ريزوتو و البيض بالبسطرمة اسمه ايج بيكون، طبعا البوركيني هنا بيعاني بشدة و اكيد الجلاليب ملهاش وجود ما هو مش معقول واحدة بجلابية هتنزل في شاطيء اسمه كيكيز او بلايا واللي لو نطقتها بال b ممكن يرحلوك فورا وحد من اهلك يجي يستلمك من قسم الحمام،الست بتطلع علي البحر كأنها رايحة فرح بنت اختها و بتلبس كل ما تملك من مجوهرات و ياقوت والماظ و بتعمل شوبينج للشهرين دول طول ال١٠ اشهر اللي قبلهم، هنا مفيش قري أساسا و اوعي تنطق كلمة قرية ولازم تحفظ كل ألوان هاسيندا ريد ووايت و بلو و بلاك عشان محدش يهرشك و يعرف انك بيئة، هنا اليوم مقلوب ومحدش بيصحي بدري عشان السهر اهم ولازم تظبط علاقاتك مع حد جامد من وزير وانت طالع عشان يحجزلك في اماكن السهر الجامدة واللي بتبدأ من ١٥٠٠ جنيه غير شامل اي حاجة و احمد ربنا انهم دخلوك أساسا …….
